Йошкар-Олаште «Йоча филармоний» почылтеш. Тушто самырык артист-влакым кугу сценылан ямдылат. Йоча филармоний тиде йӧршын у туныктымо кумдык. Тушто 6 гыч 9 ияш марте йоча-влакым вучат. Студийыш 2 группым погат: куштышым да мурышым. Тыгак йоча-влак актер мастарлыкым тунемаш тӱҥалыт. Изи артист-влакым Сапаев лӱмеш опер да балет театрын артистше-влак Татьяна ден Алексей Чистяковмыт туныктат. А Александр ден Елизавета Селивановмыт йоча филармонийым вуйлатат.