Марий гармонь дене шоктышо мастар-влакын вашлиймашышт. Советский районысо Виктор Бурлаков лӱмеш Кужмарий тӱвыра пӧрт ожнысо однорядке гармонь дене шоктен моштышо гармоньчо-влакым кугу фестивальыш чумыра. РСФР-ын, Марий АССР-ын калык артистше Виктор Бурлаковым шарныме «Под однорядку» лӱман гармонь фестиваль-конкурс 20 сентябрьыште 11 шагатлан тӱҥалеш. Ты усталык вашлиймашым тӱвыра пашаеҥ-влак тале артист, землякыштын шочмо кечыж вашеш ыштат. Тений Виктор Бурлаковын шочмыжлан 22 сентябрьыште 98 ий темеш. Тудым шарныме лӱмеш фестиваль тений кокымшо гана уста гармоньчо-влакым пога. Тыге тошто семӱзгарлан йомаш огыт пу.