Лесник, егерь, эколог да чодыра промышленностьышто тыршыше-влак сентябрьын кумшо каныш кечынже шкеныштын пайремыштым палемденыт. Республикыштына чодырам аралымаште да пойдарымаште вич тӱжем наре еҥ тырша. Марий Элын Конгресс полатыштыже тиде отрасльыште пашам ыштыше-влакым саламленыт. Ты аланыште тыршыше шуко еҥлан Почётан Грамот ден пӧлек-влакым кучыктеныт. Кажне чодыразе кушто могай пушеҥге кушмым пала, икмыняр шӱдӧ гектар чодырам онча, арала да ужар поянлыкым шукемден шога. Суапландарыме-влак коклаште Волжск районысо Алексеевский лесничествын Сотнур участкыжын лесникше Олег Григорьев. Тудо чодыра отрасльыште 36 ий наре тырша.