Элнан аралалтме историйже. Йошкар-Олаште «Россий кугыжаныш суверенитетым аралымаш. Историй да тачысе кече» ончер почылтын. Тудо Наумов купечын пӧртыштыжӧ, сарзе чап залыште верланен. Экспозицийыште кумло утла стенд. Тушто 16-шо курымысо Смутный жап гыч тӱҥалын тачысе кече марте Российын историйже, Кугыжанышын йот элысе тушман деч аралалтмыже ончыкталтын. Историйым фотографий да историй сынан документ пеҥгыдемда. Ончер Российысе калыкын шке эрыкше верч шогымыжым раш умылтарен ончыкта. Выставкым Российысе сарзе да историй ушемын Марий Элысе пӧлкаже чумырен.