1 октябрьыште Илалше еҥ-влакын тӱнямбал кечышт палемдалтеш. Владимир Дальын мутержылан эҥерташ гын, илалшылан 50 ийым эртыше еҥ шотлалтеш. Таче тиде йӧршеш тыге огыл. «Пел курымым вончымеке, илыш тӱҥалеш веле», - тидым психолог-влакат палемдат. Кӧ гын тиде пагытыште амалкалче семын шке пашам виктараш, кӧ блогым вӱдаш тӱҥалеш, а кӧ гын муро тӱняшке ушнен, шкалан чон йӧратыме сомылым муэш. Мутем тӱҥалше мурызо Майя Ахметянова нерген. Тудын дене мемнан корреспондентна Дмитрий Веденькин вашлийын.