Марий Эл Республикысе Тимофей Евсеев лӱмеш калыкле тоштерын пашаеҥже, этнограф Надежда Васканован «Йочалан-марла» проектше Росмолодёжын конкурсыштыжо сеҥен. Проект дене пашам тений шошым тӱҥалыныт. Марий йоча фольклор материалым мемнан республикынан районлаштыжат, Башкортостанын Мишкан районыштыжат погеныт. Курыкмарий, эрвел ден олык марий-влакын тӱшкан илыме верлашкышт экспедицийышке коштыныт. Кова ден коча-влак дечын йодыштыныт, аудиом возеныт. Тыгак проект вуйлатыше Надежда Васканован воткыл лаштыкышкыжат еҥ-влак шке материал-влакым колтеныт. Тачысе кече марте шуко да тӱрлӧ материал погалтын.