Кужэҥер кундемыште «Инфраструктура для жизни» нацпроект почеш автомашина корным уэмденыт. Тиде паша Йорош – Тумньымучаш – Коҥганур корно ужашыште шукталтын. Подрядный организаций 4 меҥге кужытышто шартышым уэмден. Пашаште йӱштӧ регенераций йӧным кучылтыныт. Вӱдым колтышо вич пучым тӧрленыт. Тылеч посна корно тӱрым пеҥгыдемденыт, авыртышым шынденыт, корно разметкым ыштеныт.