Таче кечын улам пиалан. Лач тыге маналтеш Наталия Алексееван лӱмгече концертше. Тудо 4 декабрьыште М. Шкетан лӱмеш марий кугыжаныш драме театрыште эрта. Концерт артистын 35 ийым темымыжлан да усталык пашаште лу ий тыршымыжлан пӧлеклалтын. Наталия Морко район Шӱргӧ ялын шочшыжо. Ӱдыр изинекак усталык шӱлышан кушкын. Школ деч вара И.С. Палантай лӱмеш тӱвыра да сымыктыш колледжыш режиссёрлан тунемаш пурен, икмыняр жап гыч М.С. Щепкин лӱмеш кӱшыл театр училищыш каен.