Республикыштына «ДоброСлёт. МариТыл» кумшо гана эртен. Тудо Марий Элысе олала ден районла гыч тӱжем наре волонтёрым ушен. Нине чолгаеҥ-влак СВО-што улшо салтак-влаклан, госпитальыште кийыше сусыргышо-влаклан кече еда полшат. Шке пашаштлан нимогай оксам огыт йод. Гуманитар полышымат погат. Пайремыште шкешотан ончер пашам ыштен. Кажне муниципалитетын волонтёржо-шамыч шкеныштын пашашт нерген каласкаленыт. Теве, мутлан, У Торъял районысо Чӱксолаште волонтёр-влак тӱвыра пӧртыштӧ погынат. Шокшо носки ден пижергым пидыт, ургат, чайым коштат, маскироватлыме сетьым пидыт.