Тӱжем наре чолга еҥ- ик форумышто. Медведево районысо Руэм кыдалаш школышто «Российын йӱлышӧ шӱмжӧ» форум эртен. Тудо «Движение первых», «Совет первых» ушемын еҥжым да нунын наставникыштым чумырен. «Движение первых» толкын самырык-влакым командыште пашам ышташ, шке проектым илышыш шыҥдараш туныкта. Тудо 2022 ийыште Россий Президент Владимир Путинын кумылжо почеш тӱҥалтышым налын. Марий Элыште толкын 2023 ий январь гыч икмыняр виктыш дене пашам ышта. «Тимуровец-влак» пенсионерлан полшат, «Хранители истории» виктыш дене тунемше-влак памятник да мемориалым шотышто кучат, «Мы вместе. Дети» лӱман проектын участникше-влак СВО-лан полшат: окоп сортам ыштат, маскироватлыме сетьым пидыт, салтак-влаклан серышым возат.