«Тачысе кече марте Курыкмарий районысо Йоласал тӱвыра да кидпаша пӧртыштӧ тыгай вургемым урген огынал», - ойлат тушто тыршыше мастар-влак. Тыге нуно Курыкмарий Йӱштӧ Кугыза ден тудын уныкаже, Лумӱдырын, вургемже нерген ойлат. Костюм-влакым ургымо нерген шонымаш Кидпаша пӧртым вуйлатыше Нина Тятюкован да ургызо Софья Крючкован шукертсек лийын. Йодмаш пурымеке, мастар-влак Йӱштӧ Кугызан мыжержым ургаш пижыныт. Тудым ожнысо курыкмарий калыкын мыжерже семын ыштеныт. Тыгак Лумӱдырын костюмжо шочын.