Эртыше курымласе ӱзгарет уло – тоштерлан пӧлекле. Тимофей Евсеев лӱмеш тоштер кажне ийын 1 февральыште пӧлеклыме кечым эртара. Тиде акций 2018 ий гыч эртаралтеш да этнограф Тимофей Евсеевын шочмо кечыжлан пӧлеклалтеш. Ий гыч ийышке тушко утларак еҥ ушна. Марий Элыште илыше-влак шке тукымыштын историй шотан фотосӱретыштым, лӱмлӧ еҥ-влакын кучылтмо арверыштым конден кертыт. Нуно тоштерын фондшым пойдарат.