Тазалык – айдемын тӱҥ поянлыкше. Тудын шотышто тӱняште илыше кажне айдеме эн ончычак шкеже азапланышаш да идалыклан кеч ик гана тергалтшаш, диспансеризацийым, профосмотрым эртышаш. Диспансеризацийын полшымыж дене могай-гынат лӱдыкшӧ черым ончылгоч пален налаш, мутлан, шӱм-вӱргорно патологийым, диабетым, онкологийым, хронический шодо черым муаш лиеш. Тазалыкым тергыме кампаний идалык мучко шуйна, кызыт тудо Шернур округ Чылдемыр ялысе врачебный амбулаторийыштат кая.