Ковайын шондыкыштыжо мо уло? Тидын дене йоча-влакым Республикысе марий тӱвыра рӱдер палымым ышта. Тений тӱвыра рӱдерын специалистше-влак уэш республикысе школлашке лектын кошташ тӱҥалыт. Кызыт репетиций-влак эртат, организаций шотышто йодыш-влакым каҥашат. Палемдем, «Ковамын шондыкшо» проект 2025 ийыште тӱҥалын. Тений программым уэмденыт, тудым сылнымут-сылнысем композиций, калык муро, почеламут, тушто-влак дене пойдареныт. Тыгак программе кышкарыште йоча-влакым калык семӱзгар, вургем дене палымым ыштат.