Йошкар-Олаште икымше гана Республикысе агрофорум эртен. Тиде кечын Самырык-влак Полатышке фермер-влак, агробизнесын, верысе кучемын еҥышт погыненыт. Форум радамыште деловой вашлиймаш-влак, секций-влак пашам ыштеныт. Эн тӱҥжӧ - кум ойпидышым пеҥгыдемденыт. Кокытшо - Марий Элысе ялозанлык да продовольствий министерстве ден «Коблик групп» холдинг, тыгак «Владимирский трактор» ООО коклаште. Аграрий-влак шкеныштын продукцийыштым, нӧшмым, шындышаш материалым, кушкылым аралыме средства-влакым да молымат ончыктеныт. Тыгай пайрем-влак шке озанлыкыштым вӱдышӧ еҥ-влакланат пеш кӱлешан улыт.