Уста поэт да киноактёрын лӱмжым чапландарат. Шернур округ Марисола кундемыште Йыван Кырлам шарныме кече-влак эртеныт. Шкешотан акций тудын шочмо кечыжлан пӧлеклалтын. Тений лӱмлӧ шкевелчынан шочмыжлан 117 ий. Поэт да киноактёрым шарныме лӱмеш арнян пашаже ече таҥасымаш гыч тӱҥалын. Марисолаште тудо 39-ше гана эртен. Стартыш 140 утла спортсмен лектын. Арня тыгак лӱмлӧ еҥ-влак дене вашлиймашлан поян лийын. Марисола кыдалаш школын тунемшыже-влак ты кундемын мутшӱдырышт Зинаида Ермакова, Зоя Дудина, Дина Рычкова, Юрий Соловьёв да моло талантан шкевелчышт дене вашлийыныт.