М. Шкетан лӱмеш Марий Кугыжаныш драме театрын историйже, эртыме корныжо нерген сорта тул волгыдышто каласкаленыт. Театрын воштончышан фойештыже сылнымут, историй сынан вашлиймаш эртен. Толшо уна-влаклан «Шонен лукдымо историй» экскурсийым эртареныт, артист-влак марий сылнымутлан негызым пыштыше Сергей Чавайнын «Автономий» пьесыжым лудыныт. Вашлиймашыште вуйлатыше, режиссер-постановщик Александр Янаевын 130 ияш лӱмгечыжлан пӧлеклалтше кутырымаш посна верым налын. Интерактив зоно-влак пашам ыштеныт.