Ветеринарий Комитет регионысо эпидемиологий обстановкым эскера. Специалист-влакын палемдымышт почеш, тачысе кечылан кайык грипп шотышто Марий Элыште обстановко сай. Тидым мӧҥгысӧ да ир кайыкын биоматериалыштым тергымеке, иктешленыт. Сандене, айдемын кайык грипп дене черланаш лӱдыкшӧ уке. Ушештарена, кайык грипп черын вирусшым ир кайык-влак конден кертыт. Ветеринарий комитетыште палемдат, кайык гриппын 16 серотипше уло, нунын кокла гыч 13-шо дене лач кайык-влак гына черланат. 3 серотипше дене еҥ-влакат черланен кертыт.