Марий Элыште илыше-влакым «Библиойӱд» Российысе акцийыш ушнаш ӱжыт. Ий еда эртаралтше акций тений 15-ше гана лиеш. Мероприятий кундемнан кажне гаяк книгагудыштыжо эрташ тӱҥалеш. Ты радамыште – Валентин Колумб лӱмеш йоча да самырык-влаклан книгагудо, тудат шке лудшыжо-шамычлан кумда программым ямдыла. Тенийысе «Библиойӱдын» темыже тыге йоҥга: «Калык-влакын икоян улмышт – Российын вийже». Ты темым арам огыл ойырен налме, 2026 ийым Российысе калык-влакын икоян улмо идалыкышт семын увертарыме. Ты кастене кажне еҥ шке кумылжо почеш тӱрлӧ мероприятийыш, мастарлык классыш ушнен, тыгодымак у книга-влак дене палыме лийын кертеш.