СВО-н кок участникше, Мужество Орденын кавалержылан Марий Элын Вуйлатышыже Юрий Зайцев кид дене виктарыме автомобиль-влак деч сравоч-влакым кучыктен. Алексей Протасевич ден Андрей Зубковлан ынде ятырлан йӧнан лиеш. Регион Вуйлатышын полшымыжо дене СВО-н ветеранже-влак ӱмаште Марий политехнический техникумышто кид дене виктарыме машина-влак дене кудалышташ тунемыныт. «Москвич» автомобиль-влак ампутироватлыме йолан инвалид-влаклан келыштарыме улыт. Нине машина-влак СВО-н ветеранже-влакын илышыштым куштылемдат.