Сценысе декорацийым яндар юж да шӱдыран кава алмашта. Шкетан лӱмеш марий кугыжаныш драме театр районлаште, пӱртӱс лоҥгаште спектакль-влакым шындаш ямдылалтеш. Ик эн ончыч театрын артистше-влак Шернур кундем Чылдемыр ялыш спектакльым наҥгаят, 29 майыште «Кеҥеж йӱд» мурсем комедийым ончыкташ тӱҥалыт. Верысе калык ты вашлиймашым шӱм вургыж вуча. Тидлан амалжат уло: «Кеҥеж йӱд» спектакльыште тӱҥ рольым шкевелчышт, Чылдемыр ялын ӱдыржӧ Марина Воронцова модеш.