Марий Эл Вуйлатыше паша визит дене Чыкма ола ден Курыкмарий районыш миен коштын. Эн ончыч Александр Григорьев лӱмеш художественно-исторический тоштерыште вашлиймаш эртен. Юрий Зайцев Чыкма олан чолгаеҥже-влакын пашаштым аклен да награде-влакым кучыктен. А тоштерлан сӱретче Андрей Санниковын пашажым пӧлеклен. Вара «Дарование» школ-интернатыште уэмдыме пищеблокым ончен лектын. Школ кумдыкым тӱзатымымат аклен. Чыкма олан ӱлыл, исторический ужашыжым кугу вашталтыш вуча. Мутлан, вӱдпуч шотышто модернизацийым ыштат.