Чолга самырык марий ӱдыр-рвезе-влак 18-ше гана пырля чумыргат. Марий Эл Россий кӱкшытан марий самырык тукым слётым вашлияш ямдылалтеш. Тений слёт Йошкар-Олаште Калыкле сымыктыш гимназий пелен 6 гыч 11 июль марте лиеш. Слётын пашаже Российысе калык-влакын икоян улмо идалыкыштлан пӧлеклалтеш. Тудым Республикысе тувыра министерстве, Самырык-влак политике комитет, «Социал иницитив рӱдер», «Эр Вий» ден «ВийАр», «Мер Каҥаш» мер ушем-влак эртарат.Марий самырык тукым слётыш 16 гыч 35 ияш марте марий шӱлышан, чолга ӱдыр-рвезе-влак чумыргат.