Пӧтъял черкылан – 130 ий. Волжск кундемыште гына огыл, уло республикыште чапланыше храмын лӱмгечыжым кугу пайрем дене палемденыт. Черкым 1896 ийыште чоҥеныт. Совет жапыште ты храм уло Марий кундемыште православийын рӱдыжӧ лийын. Тачат тышке еҥ-влак Йошкар-Ола, Волжск, Звенигово, Зеленодольск да Российын вес олалаж гыч толыт. Юбилей кечынат храм воктен тӱжем дене еҥ лийын.