Марий кундемын икмыняр районыштыжо Сӱрем кумалтышлан ямдылалтыт. 10-17 июльышто Морко ден Юлсер кундемлаште илыше-влак Сӱрем арням палемдат. Тений Морко район Унчо кундемысе Мер отышто Сӱрем кумалтышыш 12 июльышто лектыт. Волжский округысо Кугу Корамас велысе Кабаксола ял воктене Сӱрем отышто кумалтыш 13 июльышто лиеш. 17 июльышто, кугарнян, Усола ял калык Онапу ончылан тауштен пелешта да Сӱрем Юмо дене вес ий марте чеверласа.