Республикысе ялозанлык-влак кормам ямдылат. Шудым план гыч 70 процентым ямдылыме. Сенаж дене планым шуктымо. Кызыт силосым ямдылат. Тачысе кечылан 54 тӱжем тонным оптеныт, - палемдат регионысо ялозанлык министерствыште. Тыгак люцерным кокымшо гана солат. Тудым сенажышке оптат. Кугурак озанлыклаште кукуруз лиймым вучат. Тиде пашашке иктаж 10 кече гыч лектыт. Тачысе кечылан республикысе ялозанлыклаште кукурузым 14 тӱжем гектарыште шынденыт. Кормам ямдылыме дене пырля, пасулаш пырчан шурным погаш лектыныт.