Православий верам кучышо-влак Мӱй спасым палемденыт да Успений пӱтыш тошкалыныт. Марий йӱла почеш – Мӱкш илян кече. Чарла кремльыште поро йӱлаш пурышо ялозанлык ярмиҥга эртен. Ий еда тудым Марий Элын ялозанлык да продовольствий министерствыже эртара. Ведомствын палемдымыже почеш, Марий Элысе мӱй ӧрдыж кундемлаштат кугу чапым налын. Тудым турист-влакат аклат. Весымат палемдыде ок лий, кокымшо ий почела мемнан деке мӱй дегустатор-влакын ассоциацийышт толын. Нуно Марий Элысе производитель-влакын мӱйыштым аклат да сеҥышым палемдат, вер-влакым пуэдат.