Йошкар-Олаште илыше да уна-влакым «Последний лепесток» фильмым ончаш ӱжыт. Икымше гана тиде киносӱретым калык ончыко 2025 ий сентябрьыште луктыныт. Ты проект Марий Эл Виктер председательын алмаштышыже – тӱвыра, печать да калык-влакын пашашт шотышто министр Константин Ивановын темлымыже почеш илышыш шыҥдаралтын. Фильм сылнысем, куштымашлан моткоч поян. Киносӱретыш посна кумылым Йошкар-Олан архитектур ансамбльже пурта. Режиссёрын пашажат куандара, «Последний лепесток» фильмым Андрей Огородников сниматлен.