Моско оласе Тимирязев рӱдерыште уло элын агропромышленный сеҥымашыж дене палдареныт. «Шӧртньӧ шыже» ончерыш мемнан аграрий-влак Марий Элна гыч тӱрлӧ сатум, сыр ден шыл деликатесым наҥгаеныт. Тиде ганат мемнан сатуна шукыштлан келшен. Мутлан, шем мӧртньо да коллаген гыч ыштыме косметик сату. Тудым кундемнан ик аквафермыштыже ыштат. Тыгак шӧр да шыл сату, Иван-чай да чодыра емыж-саска, мӱй, поҥго да молат йодмашан улыт.