«Пушкин карт» дене пайдаланыше-влакын чотышт кажне кечын кушкеш. Марий Эл ты программым илышыш шыҥдарымаште – ончыл радамыште. Тений программылан 5 ий темын. Тачысе кечылан марий кундемыште «Пушкин карт» дене 45 тӱжем утла еҥ пайдалана. Идалык пагытыште тиде чот 13 тӱжемлан ешаралтын. 5 ий жапыште республикыште илыше самырык-влак «Пушкин карт» почеш 40 миллион теҥге наре кучылтыныт, мероприятийлашке 470 тӱжем наре билетым налыныт. Кызытсе жаплан Марий Элыште программе почеш 78 тӱвыра тӧнеж пашам ышта. Нунын кокла гыч иктыже – Сергей Чавайн лӱмеш Калыкле книгагудо.