Марий Эл 80 наре модельерым вашлийын. Каныш кечылаште Йошкар-Олаште «Калык вургем пайрем унала ӱжеш» регион-влак кокласе конкурс-фестиваль эртен. Марий Элыш Коми, Башкортостан, Татарстан республик, Пермь, Ленинград кундем гыч участник-влак толыныт. Нунын ямдылыме вургем коллекцийыштым жюри кум тӱрлӧ номинацийыште аклен: «Сценысе костюм», «Тачысе авторский вургем» да «Этнографий костюм». Программе кышкарыште тыгак «Калык вургемым чиктыман кид дене ыштыме курчак» да «Костюмын аксессуарже» ончер-влак эртеныт.