Калыкын чоныштыжо тачат илыше артист. Юлсер кундемыште РСФСР-ын сулло артистше Геннадий Копцевым шарныме лӱмеш самодеятельный театр коллектив-влак коклаште фестиваль-конкурс эртен. Памар селасе тӱвыра пӧртыш Волжск округысо коллектив-влак погыненыт. Нурмучаш Шайра клуб пеленсе «Элнет» самодеятельный усталык коллектив Николай Арбанын «Кеҥеж йӱд» пьесыж гыч ужашым ончыктен. Пӧтъял тӱвыра пӧртын директоржо Андрей Яруков пантомима дене калыкым ӧрыктарен. Карай тӱвыра пӧрт пеленсе калык театр йоча мини-сценкым шынден, Пызьыргуп ялысе клубын Саскавий коллективше Екатерина Кудрявцеван возымо пьесыж почеш «Вошт ончыш» спектакльым конден. Тиде коллективак Гран-прим сеҥен налын.