Марий Элым модельный муниципальный книгагудо-влак ыштымаште грамота да чап знак дене палемденыт

Марий Элым модельный муниципальный книгагудо-влак ыштымаште регионысо оператор дене кылым кучымо да кӱкшӧ профессионализмлан грамота да чап знак дене палемденыт. 

Тиде паша «Культура» нацпроект дене шукталтын. 

Наградым Москваште «Культурная перезагрузка: итоги и перспективы модернизации библиотечной сети» форумышто кучыктеныт. Тушто «Культура» нацпроект дене пашам шуктымо да «Еш» национальный проект нерген мутланеныт. 

Российыште 87 субъектыште 1229 модельный бибиотекым ыштеныт. Марий Элыште нуным Йошкар-Ола, У Торъял, Морко, Медведево, Звенигово, Советский, Оршанка районлаште почыныт. Модернизаций дечын вара книгагудылашке шукырак еҥ кошташ тӱҥалын. 

2025 ий гыч Россий Президентын кӱштымашыже дене у нацпроект-влак вийым налыныт. Ты радамыште ‒ «Еш». Тудын дене кинозал, книгагудо, театр да тоштер-влакым уэмдат.