Сенатор Сергей Мартынов Шернур районышто лийын

Тудо чоҥышо-влакын пашаштым аклен. Ик объект – Шернур поселкысо Юбилейный площадь. Тений пашан икымше этапше мучашлалтын, площадьын периметрже дене брусчаткым пыштеныт. Тудын покшелныже асфальтым шарат – тиде пашан кокымшо этапше лиеш, тудым вес ийын шуктышаш улыт. Шернур поселкын рӱдӧ площадьшым «Илымвер да оласе среда» нацпроектын программыже дене шуктат.

Тыгак сенатор Тиман ялыш пурымо кӱварым ончен. Неле транспорт тиде ялыш пурен кертын огыл. Йодышым умылен, регион вуйлатыше республикысе бюджет гыч 50 миллион теҥгем ойыраш кӱштен, федерал кучемат полышым ойырен.

«Корным вес ий июнь марте ыштен шуктышаш улыт, а кӱварым тений почаш палемдат», – ешарен сенатор.