Икымше тӱнямбал сарыште кучедалше-влакым шарныме кече – икымше августышто палемдалтеш. Ты пайремым 2012-шо ийыште пеҥгыдемденыт. 1914-ше-1918-ше ийлаште эртыше сар марий кундемымат ӧрдыжеш коден огыл. Регион кумдык гыч 50 тӱжем наре еҥ элым аралаш каен. Нунын коклаште – Марий Турек районын шочшыжо, икымше марий лётчик Николай Кокорин, Виктор Соколов, Павел Овчинников да молат. Шукынжо боевой награде дене палемдалтын, Георгиевский кавалер чап лӱмымат суленыт.