Морко район Эҥерсола яллан – 255 ий. Тиде ялыште шочшо, илыше, уна-влакым икте чумырен – шочмо вер-шӧрым, ты кундемым йӧратымаш да чапландарымаш. Эҥерсолаште лӱмгечылан пӧлеклалтше ял пайрем эртен. Мурызо, коллектив-влак калыклан куан кумылым пуртеныт. Фотоончер, модмаш площадке-влак пашам ыштеныт. Пайремыште тиде ялыште эн кугу ийготан еҥ да самырык еш-шамычым саламленыт. Пайремыш крестный ход дене Арын черке гыч Православный йоча лагерь саламлаш толын, йоча-влак музыкальный номерым ончыктеныт. Палемдыман, тиде ялыште воскресный школ уло. Тушко 8 йоча коштеш.