Марий Эл ТВ: Нью-Йоркышто «Горномарийская свадьба» книга дене палдареныт

Курыкмарий сӱан йӱла нерген йот элыште палдареныт. Шукерте огыл Нью-Йоркышто ООН-ын тӱп калык-влакын  йодышышт шотышто форумын 24-ше сессийыштыже  «Горномарийская свадьба» книга дене палымым ыштеныт. Тиде книгам 2023-шо ийыште Марий книга издательстве «Кугыжаныш национальный политике» программе почеш савыктен. Тудым руш, курыкмарий да англичан йылме дене возымо. Тиде альбомышто курыкмарий сӱан йӱлам почын пуымо. Архив ден кызытсе фото-влакым шуко кучылтмо. Тиде кум авторын пашаже – Российын фотохудожникше Денис Князевын, историк, этнограф Герман Устьянцевын да Курыкмарий районысо рӱдӧ клуб системын методистше, краевед Тамара Петрован.