Марий Эл ТВ: Финн-угор лагерь 29-ше гана йоча-влакым чумыра

Финн-угор лагерь 29-ше гана угыч йоча-влакым чумыра. Тений Финн-угор калык-влак гыч лекше йоча да самырык-влакын вашлиймашышт «Авангард» сарзе-патриот рӱдерыште 17 гыч 23 июль марте эртаралтеш. Российын тӱрлӧ регионлаж гыч, а тиде Карелий, Коми, Мордовий, Татарстан, Удмурт республикыла, Пермь, Киров, Угарман кундемла гыч 12 гыч 18 ияш марте ӱдыр-рвезе-влак погынат.  Лагерьыш йӱла почеш Марий Элын чыла гаяк районжо гыч чолга участник-влак ушнат. Поян туныктымо да тӱвыра программыште участник-влакым финн-угор калыкын мурымаш-куштымашыже, вургемже, калык модышыжо, фольклор ден тӱвыраж дене палдарат. Ӱдыр-рвезе-влак канаш, мураш-кушташ да тунемаш тӱҥалыт. Республикын лӱмло кидмастарже, семмастарже, чолга мер пашаен-влак тӱрлӧ мастарлык-классым ончыктат.