Йошкар-Олаште калык арвер сымыктыш тоштер-пӧртыштӧ Росийын сулло сӱретчыже Иван Ямбердовын усталыкшылан пӧлеклалтше ончер почылт

«Пӱрымашын тӱсшӧ». Тыге калык арвер сымыктыш тоштер-пӧртыштӧ почылтшо ончер маналтеш. Тудым Росийын сулло сӱретчыже Иван Ямбердовын усталыкшылан пӧлеклыме. Экспозицийым мастарын коллекцийже гыч да Тимофей Евсеев лӱмеш калыкле тоштерын фондшо гыч налме радына-влак да декоративно-прикладной сымыктыш ӱзгар-влак сылнештарат. Иван Михайловичын усталыкшын тӱҥ шонымашыж нерген ончерын лӱмжак ойла - «Пӱрымашын тӱсшӧ». Кузе палемдышт ончерым почмаште, Иван Михайлович чия-влакым тыге гына ок кучылт. Тудын усталыкше келге философий сынан. Сӱретче марий калыкын илышыжым, тудын койыш-шоктышыжым, эртыкшым эреак эскера. Пашаштыже Иван Ямбердов пӱртӱсын кажне ужашыжым моштен да тудлан гына келшыше чия дене сӱретлен ончыктен.