Шернурысо тӱвыра да каныме рӱдер 400 наре ончышым чумырен
Шернур кундемыште поэт да киноактёр Йыван Кырлам шарныме лӱмеш да «Кырланур – луй модмо вер» проектлан полшымо амал дене «Муралтем мый йывыртен!» поро кумылым ончыктышо концерт эртен. Лӱмлӧ землякым ты кастене Эльвира Попова, Алина Егошина, Маргарита Медикова, Любовь Купсольцева да молат чапландареныт. Шернурысо тӱвыра да каныме рӱдер 400 наре ончышым чумырен. Концерт «Истоки» Шернур землячестве, Республикысе марий тӱвыра рӱдер да Шернур округ администрацийын полшымышт дене эртен. Палемдем, «Кырланур – луй модмо вер» проект Йыван Кырлан лӱмжым чапландарыме, калык шарнымашым арален кодымо шонымаш дене 3 ий ончыч илышыш шыҥдаралташ тӱҥалын. Ты пашам калыкын полшымыж дене Марий Элын калык писательже Зоя Дудина наҥгая.
