Советский районын Калтаксола ял воктенысе пасушто Куралшын кечыже эртен

Советский районын Калтаксола ял воктенысе пасушто Куралшын кечыже эртен. Ялозанлык отрасльыште эн сайын пашам ыштыше-влакым палемденыт. Тӱрлӧ техникым ончыкташ луктыныт. Куралшын кечыжым палемдыме кышкарыште «Эн сай куралше-2026» профессионал мастарлык конкурсын регионысо этапше эртен. Трактор-влакын шупшмо вийыштым ончен, 4 номинацийым палемденыт. Нунын кокла гыч иктыже - «Самырык участник». Таҥасымаш кок этап дене эртен. Теорий йодыш-влак технике могырым, агрономий негызым палымаш гыч шоген. Практический ужашым пасушто тергеныт. Кажне участниклан посна участкым ойыреныт. Куралме кашын тӧржым, келгылыкшым онченыт. «Эн сай куралше» лӱм верч Республикынан ялозанлыклаж гыч 8 механизатор таҥасен.