Икте эртыше кечылаште республикыште озаланыше лум да поранлан йывыртен гын, весылан тудо нелылыкым луктын. Олаште тудын дене тӱҥ шотышто транспорт тӱкнен гын, яллаште илыше-влаклан паша кок пачаш ешаралтын.
13 январьыште Морко район Кораксолаште «Шорыкйол» пайрем эртен. Тудо Морко районын 100 ияш лӱмгечыжлан пӧлекалтме пайрем кышкарыште лийын. Тусо кундемын уста коллективше-влак ты пайремын йӱлам шуктымым, шке мастарлыкыштым ончыктеныт. Шорыкйол кузе эртыме нерген кумданрак материалыште каласкалена.
Силикатный поселкышто илыше-влаклан медицин полыш йӧнанрак лийын. Медведево районышто 2023 ий мучаште у амбулаторийым почыныт. Тудым кызытсе жаплан келшыше оборудований дене пойдареныт. Верысе калыклан чылажат моткоч йӧнан - а тиде «Тазалыкаралтыш» нацпроектын тӱҥ шонымашыже, палемден Юрий Зайцев.
Школыш пашаш толмылан 1 миллион теҥге. 2019 ий февральыште элнан Президентше Владимир Путин федерал погынлан посланийыште изирак ял шотан илемлаште туныктышо-влаклан полшаш темлен. Тыге, 2020 ийыште Россий мучко «Земский туныктышо» программылан тӱҥалтыш лийын. Тений тудо умбакыже шуйна. Программыште участвоватлаш шонышо-влак деч йодмашым 10 январь гыч 15 апрель марте вучат.
Герой, СВО-н участникше-влак нерген Марий Элыште илыше кажне кумылан еҥ каласкален кертеш. Мемнан регион Россий кӱкшытан «СВОИ» лӱман акцийыш ушнен. Палемдыман, тудым калык-влакын пашашт шотышто федерал агентство полшымо дене «Дом народов России» илышыш шыҥдара. Проектын тӱҥ шонымашыже – патырлык дене кылдалтше, илышыште лийше историй-влакым чумыраш, специальный сарзе операцийыште тӱрлӧ калык дене ваш келшыме, икте-весылан полшымо нерген каласкалаш.
