Юл да Урал кундемысе композитор-влакын музыкышт йоҥген. Башкортостан Республикысе Уфа олаште композитор, музыковед, мурызо-влакым чумырышо 32–шо фестиваль эртен. Марий Эл ат тушко ушнен. Палемдыман, фестиваль кажне ийын тӱрлӧ регионышто эртаралтеш.

Чарла Кремльыште марий шӱлыш озаланен. Марий тӱвыра рӱдер Йошкар-Олан рӱдыштыжӧ Шорыкйолым эртарен колтен. Уремыште йӱштӧ ыле гынат, калык пайремыш рӱж ушнен, муро да куштымаш полшымо дене ырен. Туштак мужедме да модмо алан-влак пашам ыштеныт. Тидын деч посна организатор-влак мӧчӧр семын чиен толшо-шамычым акленыт. Шорыкйолым кузе палемдет, идалыкым туге илен эртарет, ойленыт кугезына-влак. Ты ӱшан тачат уло, сандене кажне ийын марий-влак ты пайремым шокшын да веселан палемдат, ӱстел тич сийым погат да уна-влакым – Васли Кугыза ден Васли Кувам - вучат.

Лӱдыкшыдымылык правил – икымше верыште. Тыгай шонымаш дене пожар надзорын пашаеҥышт профилактике рейдым эртарат. Чӱчкыдын яллашке лектыт, поснак пайрем каныш кечылаште. Специалист-влак паледмат, тыгай годым чылан пожар лӱдыкшыдымылык правилым огыт эскере. Кужу каныш кечылаште чӱчкыдын мончаш олтат, южгунамже тӱткыш деч посна кодат. Сандене МЧС виктемын специалистышт профилактике рейд кышкарыште пӧрт еда коштыт да эше ик гана правилым ушештарен, суртоза-влаклан кагазым пуат але тудым почто яшлыкыш пыштен кодат.

Куженер районысо Токтайбеляк селасе «Новые звёздочки» йоча ушемын тунемшыже-влак кугезына-влакын йÿлаштым перегат да шарнат. Тиде гана нуно Шорыкйол пайремын ойыртемжым модын ончыктеныт. Семон Сидырын, Онтон Эчун, Осып Метрийын, Тикын Матранын уныкаже-влак Илян Агинян суртышкыжо мӧчӧр лийын толыныт. Нуно озакувам марий муро да куштымаш дене куандареныт, сай лектышым тыланеныт. Тыгак марий модыш дене модыныт, тутло сийым ямдыленыт.

Тӱткыш – ешлан. Россий Президент Владимир Путинын указше почеш 2024 ий элыштына ешын идалыкше семын увертаралтын. Кагазышке тидын нерген тудо эртыше ийын ноябрьыште кидпалыжым пыштен. Идалык еш-влаклан утларак тӱткышым ойырымо, тудын кӱлешлыкшым пеҥгыдемдыме, полшымо амал дене шукталтеш. Арам огыл 1 январь гычак илышышке ятыр вашталтыш пурен.

Йоча-влак коклаште ик эн йодмашан постановко. М. Шкетан лӱмеш Марий Кугыжаныш драме театрыште шындыме «Золушка» спектакль кажне гана зал тич калыкым чумыра. Декабрьыште гына 20 гана сценыште ончыктеныт. Кажне гана аншлаг дене эртен.

Марий фольклор электрон йӧн дене. «Электронный сборник марийских наигрышей» проект умбакыже шуйна. «Российысе марий-влак» федерал калыкле тӱвыра автономийын проектше почеш ынде фольклор материал, тӱрлӧ кундемласе марий муро-влак электрон йӧн дене возалтыт. Цифроватлыме проектыште умбакыже фольклор ансамбль-влак участоватлат.

«Культура» нацпроект дене кодшо ийын Марий Элысе книгагудылашке 7 тӱжем утла книгам налыныт. Фонд-влакым пойдараш 3 миллион утла теҥге ойыралтын. Тидын дене пырля Марий Элысе библиотеке-влак федерал проект дене ешарен 3 миллион теҥге субсидийым налыныт. Тудын дене 8 тӱжем утла книгам уэмденыт, ты радамыште утларакше сылнымутан да шанче литератур. Книгам 212 библиотекышке колтеныт, тушечын 185-ше ‒ ялысе книгагудо. 2020 ий гыч «Тӱвыра» нацпроект дене Марий Элыште 8 библиотекым модельный семын уэмденыт. Тушко утларак еҥ-влак кошташ тӱҥалыныт. 

Догазификаций дене пашам теният шуят. Кодшо ийын Марий Эл Республикыште илыше-влак дечын догазификаций программе дене 6630 йодмаш пурен. Тышечын 4500 пӧртышкӧ канде тулым пуртен шуктеныт. Тидын дене пырля 6 социал учрежденийышке газ толын: тиде Морко, У Торъял, Курыкмарий да Оршанка районлаште кум школ да 3 ФАП-ышке. Тидын дене пырля республикыште «Газоснабжений да газификаций» программе дене паша шуйна. Советский, Оршанка, У Торъялыште газ пучым чоҥен шуктен, канде тулым пуртеныт. Морко районышто 24 метр кужытан газ пучым чоҥаш тӱҥалыныт. Тиде пашам тений шуят.