Морко районысо 10 ялышке канде тулым пуртеныт

Кугу Кожлаялыште газ пучым пашашке колтеныт. Марий Элын вуйлатышыже Юрий Зайцев тиде мероприятийыш ушнен. 25 километр кужытан газ пучым Марий Эл Республикын газоснабжений да газификацийым вияҥдыме программыже дене чоҥеныт. Тудым ыштен шуктымеке, Рушродо, Нуръял, Кугу Кожлаял, Изи Кожлаял, Нӧрепсола, Чишкан, Волаксола, Чодырасола, Пумыр яллашке да Зеленгорск поселкышко газым пуртеныт.

Регион вуйлатышын палемдымыже дене, Марий Эл ‒ тачысе кечын газификаций дене элыште кумшо верыште. Республикыште газификаций 88 % шуэш.

Морко районышто 560 утла пӧртышкӧ канде тулым пуртен кертыт. Марий Элын вуйлатышыже Юрий Зайцев Петровмыт ешым тиде кече дене саламлен. Тыгак регионын вуйлатышыже «Газпром межрегионгазын» генеральный директорын алмаштышыже Сергей Табачук дене вашлийын. Нуно республикыште 2025 ий марте газификаций, тыгак догазификаций программе нерген мутланеныт. Программе дене 60 ялышке, 6 тӱжем утла пӧртышкӧ канде тул толшаш.