Марий Эл Правительствын заседанийыштыже йодыш-влакым каҥашеныт
Шуко пачеран пӧрт-влакым капитально тӧрлымӧ, амбулаторно эмлалтме годым еҥ-влаклан эм препаратым ситарыме, социал контракт, унитарный предприятий-влакын пашашт да моло йодышымат Марий Эл Правительствын заседанийыштыже каҥашеныт.Социал контракт нерген ойлаш гын, шагал парышан еҥ-влак кугыжаныш дечын полышым налын кертыт. Тиде оксам шке пашам почаш, але неле илыш ситуаций гыч лекташ кучылташ лиеш. Тений 8 тылзыште 739 еҥ тиде йӧн дене пайдаленен, тышечын 350 еҥ шке пашажым почын. Еҥ-влак ялозанлыкым вияҥдаш, моторлык сферыште тыршаш да сувенир сатум ышташ тӱҥалыныт.
Медицин сатум, южо категорий граждан-влаклан специализированный кочкышым налаш федерал бюджет гыч 210 миллион теҥге ойыралтын. 6 ийыште оксам 37% утларак ойыреныт. Марий Элын Правительствыже республикысе бюджет кӱшеш софинансирований йӧн дене ешартыш шийвундым ойыра. Марий Элын Вуйлатышыже рецепт-влакым возымым тергаш да эм препаратым ойырымо пашам тӱткышыштӧ кучаш кӱштен.
Шуко пачеран пӧрт-влакым тӧрлымӧ нерген ойлаш гын, тений 68 пӧртын леведышыжым, 27-ын ‒ фасадшым, 5 подвалым, 115 пӧртыштӧ инженер системым да 94 лифтым уэмдат. Республикысе адресный программыш 4 тӱжем пӧртым пуртымо. Тиде программе 2014 гыч 2049 ий марте илышыш пура.
(Фотом Марий Элысе Виктерын сайтше гыч налме)
