Пӱртӱс поянлык департаменыште республикысе чодыралаште янлыкым шотлымо пашам мучашленыт.
Телымсе учет южо янлыкын шукеммыжым ончыкта. Тидым теве мо дене умылтарат: лум тений шагал лийын, янлык-влак лум ӱмбалне куштылгын коштыныт.
Специалист-влакын палдарымышт дене шордо-влак ешаралтыныт, 8800 шотленыт. Тыгак ош мераҥ ‒ 17 тӱжем марте, рывыж 2600 марте шукемын. Ур кодшо ийысе нарак – 9400 утларак, луй ‒ 1200 утла, шурмаҥше – 130, йос ‒ 240 утла.
Департаментын пашаеҥже-влак палемдат, чодырасе кайыквусылан тений неле лийын, лум шагал улмылан кӧра, нуно шылын кертын огытыл, шукыжым пушеҥгыште шинченыт, садлан нунын кышашт шагал.
Учетым эртарымеке, ончыкылык идалыклан сонарлаш квотым палемдат, лимит дене 2025 ий кеҥежым палдарат.