Йошкар-Олаште у сылнымут унагудо шочын

Панфилов уремысе 39 номеран пӧртын икымше пачашыштыже посна пӧлемым ойыреныт. Тышке унала пурышо еҥ марий классик-влакын возымышт дене, савыктыш пӧртын лукмо у книгаж-влак дене палыме лийын, автор-влак дене вашлийын кертеш.

Республиклан тыгай тӱҥалтышын кӱлешлыкшым Марий Эл Виктер вуйлатышын алмаштышыже - тӱвыра, печать да калык-влакын пашашт шотышто министр Константин Иванов кӱкшын аклен, тиде пашам умбакыжат шуяш да вияҥдаш кӱлмӧ нерген палемден. Ты унагудым кумдаҥдаш, Марий книга издательствын лукмо сатужым уталарак шуко еҥ ужын-налын кертше манын, у вер-влакым почаш темлен.