Марий Эл ТВ: Марий Элысе Писатель ушем лÿмгечылан ямдылалтеш

Кундемыштына марий сылнымутын вияҥмыжым да писатель-влакын паша лектышыштым Россий Писатель ушемын регионысо пöлкаже виктарен шога. Тачысе кечын ушемыште 70 утла еҥ шотлалтеш. Пытартыш 14 ий Марий Элысе Писатель ушемым Светлана Архипова вуйлата. Кызыт ушемын лÿмгечыжлан пöлеклалтше литератур конкурс эрта. Кумылан-влак тушко ушнен кертыт. Сеҥыше-влакым 10 декабрьыште палемдат. Чылаже вич номинаций: тиде посна марий ден руш поэзий, марий ден руш прозо да драматургий. Марий писатель-влакын икымше погынымашышт 90 ий ончыч 12 июньышто эртен. Лач тунамак тидлан пеҥгыде негыз пышталтын, икымше ошкыл лийын. Тиде кечым Марий писатель ушемын шочмо кечыжлан шотлат.