Марий Эл ТВ: «Марий кеҥеж» фестиваль умбакыже шуйна

Кундемыштына «Марий кеҥеж» уремысе фестиваль умбакыже шуйна. Кажне арнян каныш кечылаште республикын рӱдолаштыже марий артист-влак, тӱвыра тӧнеж ден театр-влак калыклан концертым але спектакльым ончыктат. Тений фестиваль рӱдӧ площадкылаште гына огыл, тыгак кудывечылаште эртаралтеш. Фестивальын программыже концерт, ончер,  мастарлык-класс, тӱрлӧ спорт модмаш, каныме кас дене пойдаралтын. 30 августышто  Рӱдӧ каныме паркыште Республикысе марий тӱвыра рӱдерын «У муро» вокал студийже калыкым куандара. Концерт 18 шагатлан тӱҥалеш.