Марий Эл ТВ: Эн сай калык участковыйым ойырат

Эн сай калык участковыйым ойырат. 11 сентябрьыште «Калык участковый-2024» Всероссийский конкурс тӱҥалтышым налын. Тудо 3 этап дене эрта. Икымше – 11-ше гыч 20-шо сентябрь марте шуйна. Тушто Марий Эл гыч 14 участковый таҥаса. Нуно Звенигово, Шернур, Медведево, Морко, Советский, Марий Турек районла, Козьмодемьянск ден Йошкар-Ола гыч улыт. Кажныж нерген кумдарак уверым Республикысе  эл кӧргӧ министерствын сайтыштыже вераҥденыт. Онлайн йӱклымаште эн шуко йӱкым погышо 11 участковый 2-шо этапыш кусна. Йӱклымашке кажне кумылан еҥ ушнен кертеш.